【娛樂熱話】《直播靈接觸》Beyond 黃家駒墓碑遭破壞梁思浩嬲到爆粗？！

由梁思浩、黃紫恩（Jojo）及黃耀英主持的《直播靈接觸》自播出以來，觀眾及網上互動反應非常熱烈，參與網上留言及 phone in 互動的觀眾人數持續飆升。上星期思浩請來息影多年、有「波霸」之稱的葉子楣亮相，親身解說當年被指拜狐仙而爆紅的傳聞。昨晚（5 月 20 日）一集請來陰宅師皓云作嘉賓，大談陰宅風水，他更爆料韓國驚悚電影《破墓》的真人版。此外，節目亦有談及殿堂級樂隊 Beyond 已故主音黃家駒墓碑被破壞事件，以及毀人山墳會有何種報應。

毀人山墳有報應
昨晚一集甫開始，主持梁思浩顯得有點忟憎，略帶激動表示︰「今日主題講陰宅，有單新聞聽到真係好激氣，Beyond 家駒個墓碑畀人破壞……賺點擊有幾多？」在節目中段有不少觀眾留言，不少更夾雜粗言矛頭指向破壞者，思浩知道後笑言︰「條氣順晒，唔少人都鬧嗰條『友仔』。」他更以諧音疑似爆粗。
嘉賓陰宅師皓云講解先人墓碑被破壞的影響，「墓地即係先人住的地，玄學嚟講，即係好似有人喺你陽宅門口淋可樂。最大影響係用鎚仔破壞張相，對過世者屋企都唔係咁好，先人唔舒服，家人都唔舒服。」他補充說肉眼所見墓碑沒有遭受嚴重破壞，假如有裂要大修補影響更大。被問到破壞者會否有報應時，皓云師傅續說︰「我哋成日講一命二運三風水四積陰德，壞人山墳係好缺德會損陰德，健康壽命都有影響，會減壽。」

各主持跟網上觀眾互動，反應熱烈。

Beyond 已故主音黃家駒墳墓被兩名男子破壞，引來全城公憤。（網上圖片）

陰宅風水計足三年
皓云師傅展示用來尋龍探穴的工具，包括羅庚、尋龍尺、墨斗線。至於棺木選擇可以豐儉由人，反而對風水影響不大，他說︰「富貴人家一般用楠木、花梨呢類貴木材，一般人用杉木甚至環保棺都無問題。不過如果選擇土葬，用靚木會耐用，否則棺木發霉塌陷，都會影響後人風水。」
皓云師傅又話計算陰宅風水比陽宅更複雜及花時間，因為要計算先人跟親人的生辰八字及墓地座向，試過最長花了 3 年時間。做法是先下葬，待計算清楚，才立碑完成整套儀式。

皓云師傅展示睇陰宅風水的工具。