【娛樂熱話】為 TVB 新台打響頭炮｜梁思浩主持靈異直播節目！

TVB 新台開台在即，台前幕後都在搞盡腦汁開拓新節目，一新觀眾耳目。新台頭炮邀請到梁思浩夥拍黃紫恩（Jojo）、黃耀英擔任主持，拍攝以靈異直播為賣點的新節目。除了有三位主持，還請來一班玄學大師、殯葬業及廟宇界的翹楚組成顧問團，分享業界的奇聞異事。

顧問團人才濟濟
早前思浩在電視城參與節目事前會，出席的顧問團人才濟濟，包括︰「警界天師」簡信回、奇門遁甲師傅張芯熏、玄學家周亦謙、玄學家周漢明、風水師皓云師傅、六壬師傅陳法齊、狐仙堂林千博師傅、占卜師羅泳嫻，以及一班殯葬業、廟宇界的翹楚。
當日討論話題廣泛，由靈異事件、古怪殯葬儀式都有提及。單是性交轉運是否真有效、兇宅是否可以買、又有甚麼注意事項，已經夠吸引。當中更有不少話題性內容，張芯熏師傅即場分享塘西（西環）風月場所的古老習俗，話說當年妓寨琵琶仔（雛妓）賣完初夜後，會即時為恩客「帶孝」以示「喪夫」，方便升呢成為「老舉」接客，恩客還可獲得一封利是作為意頭，聽落都好有趣。

台前幕後好認真討論節目內容細節。

陰陽界版《東張西望》
節目其中一個賣點是會邀請一班久未露面藝人、名人分享靈異經歷。為增加跟觀眾互動，設有報驚熱線及靈異爆片爆相，歡迎報料提供奇異經歷。節目還有互動熱線，可以即時表達意見，讓觀眾可以參與其中，有機會贏得由各師傅開光加持的平安符。
正忙於為節目搜集資料的思浩直言對新節目，非常期待。「TVB 好耐都冇一小時嘅全直播節目，今次挑戰好大。最好玩係可以同觀眾互動，透過佢哋嘅報料、提供嘅相片，可以百分百同觀眾近距離接觸。」他笑言每次拍攝都會本住 TVB 精神「全力以赴，做到最好」，務求將節目打造成新台 Icon，再好似《通靈之王》一樣贏得國際獎項。思浩還有一大心願，就是替觀眾處理奇難雜症，豪言:「想透過節目幫香港市民，解決一啲正常途徑解決唔到嘅『問題』，堪稱穿梭陰陽界版嘅《東張西望》。」

梁思浩為新台主持的節目，名稱暫未能公佈。

黃紫恩偷師學做 Live
Jojo 首次參與靈異節目，最大的準備是吃飽、瞓飽，她笑說：「因為直播節目由下晝開始，一直拍到凌晨，要儲足精神返工。」她透露見證過思浩在網上主持的直播節目，就算去到最後時段，人數依然沒有減少，Jojo 期待地表示：「佢嘅 channel 好多人睇，而且做一個個多小時嘅直播，可以 keep 到人不斷 comment 係好高技巧。今次可以偷師，睇思浩點樣 hold 直播節目。」

黃紫恩說要跟梁思浩偷師。