【娛樂熱話】《香港婚後事》單立文 胡蓓蔚相愛 28 年分享愛情保鮮方法

由陳自瑤（Yoyo）、賴慰玲（Winki）、黎諾懿及羅天宇主持的《香港婚後事》將會今晚（5 月 9 日）播出的第 5 集，嘉賓是圈中恩愛夫妻單立文（豹哥）和胡蓓蔚（豹嫂）。兩夫婦在節目中不時打打鬧鬧，互相開玩笑，甜蜜互動盡顯默契。當中豹哥大晒幽默本色瘋狂答非所問，激到一班主持紮紮跳，氣氛歡愉！

豹嫂激到豹哥睇醫生
相愛 28 年的豹哥、豹嫂恩愛如昔，身為「單身狗」的羅天宇請教兩人愛情保鮮法，豹哥回應問題，大拋婚姻哲理。「婚姻係兩個人三唔識七喺埋一齊，之後產生一種化學作用叫愛情，之後到你 Commit 要照顧一生一世。講就易囉，當你途中遇到咁多嘢嗰陣，你個心會唔會動搖？會唔會想放棄？你要重拾正軌去鞏固番個婚姻，係好艱難。一段婚姻共富貴係好容易，共患難就唔容易。」
豹嫂則指最近因一事，令她有新的領悟。「最近我激親我老公，激到佢睇醫生。原本係好小事，但大家喺度互頂，佢話：『你收聲！』我話：『我好冷靜，你有咩資格叫我收聲，我做咩要收聲，我而家叫你收聲！』之後佢個胃就唔舒服，個肚好多氣，Gur 咗幾日，跟住佢去睇醫生，食咗兩個月胃藥。」豹哥笑言：「佢依家好似好輕描淡寫，但當刻係好挑釁！」豹嫂自認性格比較直和倔，經此一役後學識對老公要溫柔一點。

單立文、胡蓓蔚瘋狂打打鬧鬧，這亦是他們相處之道。

胡蓓蔚最近激到老公睇醫生，佢還重演當時的情景。

步入婚姻之因由
豹哥、豹嫂拍拖 12 年後才走進婚姻的殿堂，問到他們當時為何想結婚時？豹嫂坦言：「係我同佢講結婚嘅，當時好多朋友都係做藝術方面嘅工作，佢哋話結婚生仔冇可能，點知一講完，佢哋就結咗婚，之後再生咗兩個小朋友。之後我去探我個朋友，佢好語重心長同我講，其實你哋都要諗諗係咪要結婚，之後我返到屋企，我就話邊個話我哋係咪要結婚呢，佢聽完之後就話好呀。」豹哥則說：「我覺得結婚唔係一件大不了嘅事，簽一張紙就代表你一生一世愛呢個人咩？唔係吖嘛，呢個形式係做畀啲老人家睇，或者係做畀朋友睇，係一場大龍鳳嚟。」談到千年難解的婆媳關係，豹嫂大讚奶奶非常開明，從來都不會給她壓力。

單立文覺得結婚只是一場儀式，做給長輩同朋友睇。

豹哥不後悔拍三級片
豹哥有個外號叫「西門慶專業戶」，豹哥亦大方分享拍過三級片的過去。「蔡瀾當初簽咗我三部（電影），佢話第一套冇嘢㗎，係個書生喺度打啲妖咁，Lur 住帶過咁囉。」豹哥坦言沒有後悔過拍愛情動作片，「如果你應承要做，你就要努力做好佢。」豹哥更雲淡風輕拋下一句：「都係歷史人物啫，冇咩大不了！」相當瀟灑。

單立文冇後悔拍過愛情動作片，覺得接了個角色就要做到最好。

節目尾聲，豹哥矛頭直指有「女神收割機」之稱的羅天宇身上，追問他對婚姻有沒有憧憬。